როგორია ნამდვილი ბიტლომანი?

რათქმაუნდა  ნამდვილი ბიტლომანი არის ის ვისაც სათანადოდ უყვარს ბითლზი, უსმენს და იცის მასზე ბევრი რამ.  თუმცა   ეს ძალიან მშრალი დახასიათებაა, აკი სულ იმას გავიძახი, ბითლზი მარტო მუსიკა არ არის თქო? ბიტლომანი კიდევ არაა (ყოველშემთხვევაში არ უნდა იყოს) მხოლოდ, ადამიანი რომელიც უსმენს და უყვარს ბითლზი. მე ვფიქრობ ბიტლომანობა უნდა მოიცავდეს ბევრ რამეს,  და შესაბამისად უნდა გამორიცხავდეს კიდეც.  მაგალითად მე ვერ წარმომიდგენია სამხედრო ჩინოვნოკი, ბიტლომანი, რომანტიული, All you need is love-ს რომ უსმენს ან ლენონის და საერთოდ 60-იანების პაციფისტურ განწყობას იზიარებს Make love not war.

 წარმოუდგენელია ბიტლომანი იყოს კონსერვატორი და პედანტური. ბითლზი ხომ ახალი ვარცხნილობაა, ახალი მუსიკალური ეპოქის ჩანსახი, ახალი იდეების დასაწყისი და ცხოვრების სტილის ახალი საფეხური. ადამიანი რომელიც ამ ყველაფერს გრძნობს ბითლზის მოსმენისას და იზიარებს როგორ შეიძლება იცავდეს ისეთ სტერეოტიპულ შეხედულებებს მაგალითად როგორიცაა: “მე არაქალიშვილი არ შემიყვარდება” ვერ წარმომიდგენია ბიტლომანი რომანტიკისა და ლიბერალური შეხედულებების გარეშე. ანდაც ბიტლომანი რომელიც ყველაფერს რეალისტურად უდგება. ძალიან უცნაურია ღრმად მორწმუნე ბიტლომანიც. წარმოუდგენელია სამყაროს აღიქვამდე მკაცრად იერარქიულ და ცენტრალიზებულ სისტემად, რომლის თავში ყოვლის შემძლე ღმერთია, მოგწონდეს მისადმი თაყვანისცემა და მუხლებზე ხოხვა, და ამავე დროს გიყვარდეს ლენონი თავისი რევოლუციური ხასიათით, ღმერთთან დაპირისპირებით და ათეიზმით. შეუძლებელია იყო ნამდვილი ბიტლომანი თუ ამბობ რომ მე მარტო მუსიკა მიყვარს და მათ პირად შეხედულებებთან რა მესაქმებაო. უაზრობაა იცხოვრო შენი რელიგიის ვიწრო სუბიექტურ სივრცეში და უსმინო ჰარისონს რომელიც ყველა რელიგიურ შეხედულებაზე მაღლა დგება და ყველა ღმერთს აერთიანებს ერთ ღმერთში.

არც პოლიტიკოსი ბიტლომანების მჯერა. რა ესაქმება პოლიტიკის ყალბ სახეს  ბითლზთან, რეგლმანეტებს და ჩარჩო ხელშეკრულების ოფიციალურ ენას თავისუფლებასთან და მუსიკასთან?

ბიტლომანობა თავისთავად კარგ მუსიკალურ გემოვნებასაც უნდა გულისხმობდეს. წარმოგიდგენიათ ბიტლომანი რომელიც “არ დაიდარდოს” რეპერტუარს უსმენს? თუნდაც სიმთვრალეში? 🙂  ან უსმენს ქართულ/რუსულ “ესტრადას”?  ტვინის გამოსალაყებელ ე.წ “ჰაუსებს”  ლაპლაპა კუნთების და ცელულიტების დემონსტრირებით გამოტენილ პრიმიტიულ კომერციას.

თუ ნამდვილი ბიტლომანი ხარ შეუძლებელია იყო გულცივი, შორს იყოს შენგან ოცნება და სიყვარულისკენ სწრაფვა.

არ ვიცი შეიძლება არც მეთანხმებით ბევრ რამეში, მაგრამ მე ასე მესმის ბიტლომანობა 😀 ბითლზი არაა მხოლოდ მუსიკა, ბითლზი არის სიტყვა, ღირებულებები და იდეოლოგია. თუ ხარ ბიტლომანი ამ ყველაფერს იზიარებ თუ არადა არ ხარ  ნამდვილი 😀 თუ ლენონს არ ეთანხმები ჰარისონს მაინც უნდა დაეთანხმო.